Testi i maturës do të anulohet, pjesërisht. Kështu, do të veprojë Ministria e Arsimit, me qendrat ku evidentohet se ka pasur parregullsi, raporton KTV.

Por në rastin tjetër mund të ketë edhe anulim komplet.

Mustafë Kadriu shef i Divizionit për standarde vlerësim dhe monitorim, është shprehur se kjo që ka ndodhur është për të ardhur keq pasi në këto rrethana, ata që më së shumti pësojnë janë nxënësit. E, ajo çfarë i pret nxënësit është edhe më keq.

Nëse anulohet ky afat testimi, do të jetë vetëm ai i gushtit dhe nuk do të jenë dy afate si më parë. Kadriu ka bërë të ditur se të gjithë ata mësimdhënës që kanë shërbyer si administrator në qendra të testimit ku do të vërehen manipulimet, do t’u publikohen emrat dhe të merren masa ndëshkuese ndaj tyre.

Ndërkaq, nga Policia e Kosovës, bëhet e ditur se ende nuk është hapur asnjë rast, lidhur me testin e djeshëm.

Kundër anulimit të testit është njohësi i çështjeve arsimore, Dukagjin Pupovci.