Këtë vit definitivisht nuk do të ofrohen studime në Departamentin e Matematikës të Fakultetit të Shkencave Matematiko-Natyrore në Universitetin e Prishtinës “Hasan Prishtina”.

Ministria e Arsimit, Shkencës dhe Teknologjisë (MASHT), i ka kthyer përgjigje negative kërkesës së rektorit të UP-së, Ramadan Zejnullahu, i cili kishte kërkuar të lejohet shpallja e konkursit për regjistrimin e studentëve në këtë departament për vitin akademik 2014/15. Lajmin e ka bërë me dije për “Epokën e re”, Arbër Morina, këshilltar i ministrit të Arsimit, Ramë Buja. “Ne shprehim keqardhje për kandidatët, të cilët janë të interesuar që të studiojnë në Departamentin e Matematikës, por ministria nuk mund të lejojë shpalljen e konkursit në një program të paakredituar”, ka thënë Morina.

Sipas tij, nëse lejohet shpallja e konkursit në një program të paakredituar, atëherë do të ishte shkelje e akteve ligjore.

Agjencia e Kosovës për Akreditim (AKA) më 2 korrik kishte akredituar programe studimesh e institucione, por jo edhe programin e Matematikës, që është në kuadër të FSHMN-së.

AKA e kishte marrë me vonesë aplikacionin për akreditim nga Departamenti i Matematikës dhe si pasojë e kësaj, programi nuk ishte akredituar. Aplikacioni në AKA kishte shkuar një muaj para se të dalin rezultatet.
Ndërkohë, mbledhja e radhës e bordit të Këshillit Shkencor të Cilësisë është në nëntor dhe pa u aprovuar vendimi i ekspertëve të bordit, nuk mund të ketë akreditim. Programi i Matematikës kishte qenë i akredituar deri më 30 shtator 2014.
Mosakreditimi i këtij programi pati ngjallur shumë pakënaqësi në tërë shoqërinë.