Prej tre deri në pesë vjet do të dënohet dhe me moslejim që të marrë pjesë në provimin e maturës maturanti që zihet duke kopjuar, në provim të maturës. Ky vendim është marrë nga Ministria e Arsimit, Shkencës dhe Teknologjisë e Kosovës (MASHT) në kuadër të Udhëzimit Administrativ lidhur me provimin e maturës që po hartohet nga kjo Ministri.

Udhëzimi pritet të hyjë në fuqi javën e ardhshme. Ndërsa, nxjerra e këtij udhëzimi sipas zyrtarëve të lartë të MASHT-it, është nxitur nga parregullsitë e shfaqur të shtunën gjatë mbajtjes së pjesës së parë të provimit të maturës, e që kryesisht u karakterizuan me vjedhje individuale dhe grupore të maturantëve në provim.

Zëvendësministri i Arsimit, Nehat Mustafa, që njëherësh është edhe udhëheqës i Komisionit Qendror Shtetëror të Maturës (KQSHM), ka zbuluar për “Zërin” detaje rreth hartimit dhe fuqizimit të këtij udhëzimi, me të cilin parashihen dhe masa ndëshkuese për mësimdhënësit. “Ndëshkimi për maturantët dhe mësimdhënësit nuk do të jetë siç ka qenë paraparë me aktet ligjore të mëhershme deri në dy vjet moslejim të hyjë në provim.

Pjesa e dytë e provimit të maturës që do të mbahet më 28 qershor do të organizohet duke përfshirë dhe udhëzimin e ri administrativ, kështu që dhe masat ndëshkuese do të aplikohen të rejat”, ka thënë Mustafa, duke shtuar se maturantët që zihen duke kopjuar nuk do të lejohen të hyjnë në provim prej 3-5 vjet. “Por, masat ndëshkuese do të jenë më të rënda dhe për administruesit (mësimdhënësit), pasi ata do të ndëshkohen për papërgjegjshmëri me marrje të licencës së mësimdhënësit”, ka theksuar ai, duke pohuar se ishin disa administrues që shkaktuan parregullsitë, duke mos qenë në nivel të detyrës gjatë mbajtjes së provimit.

“Këto masa do të ndalojnë maturantët të kopjojnë, se përndryshe në qoftë se dhe me organe të sigurisë ne i kontrollojmë një nga një tek dera, duke iu marrë një apo dy telefona, të tretin mund ta fshehin, sidomos problemi paraqitet te kontrollimi i vajzave”, tha ai.

Rezultatet e raporteve nga të gjitha qendrat e testimit pritet të publikohen në fund të kësaj jave, ku më pas do të merren masat ligjore ndaj të gjithë shkelësve të procesit. Mustafa ka pranuar se MASHT-i është duke marrë raportet nga qendrat e testimit, dhe se në bazë të tyre do të nxjerrë dhe emrat e kopjuesve, por, sipas tij, identifikimi i atyre që kanë thyer rregullat mund të bëhet publik vetëm në fund të javës. Testi i maturës shtetërore mund të anulohet pjesërisht. “Provimi nuk mund të anulohet në tërësi dhe të pësojnë të tjerët pa faj”, tha ai.

Ndërkohë, gazeta ka mësuar se edhe Prokuroria e Shtetit është duke u marrë me çështjen e maturës. Mustafa ka thënë se është takuar me prokuroren e Shtetit, Laura Pula, me të cilën janë dakorduar që MASHT-i t’i dërgojë një dosje me emra dhe fakte të atyre që kanë thyer rregullat e provimit të maturës.

“Kemi mbledhur dhe shumë emra të zyrtarëve që s’kanë qenë në detyrë ose kanë qenë qytetarë, studentë që kanë ndikuar te maturantët të kopjojnë…”, ka thënë ai, duke shtuar se të gjithë emrat që MASHT-i po identifikon do t’ia dorëzojë Prokurorisë, e pastaj Prokuroria sipas premtimit të dhënë MASHT-it do të jetë jashtëzakonisht funksionale sa i përket këtyre rasteve. Pjesa e dytë e provimit do të mbahet më 28 qershor. Provimit shtetëror të maturës i janë nënshtruar rreth 46 mijë maturantë.