Ministria e Arsimit nuk e ka mbajtur premtimin që të dalë me emër dhe mbiemër të nxënëseve dhe administratorëve të cilët kishin manipuluar me testin e maturës të shtunën e 14 qershorit. Drejtues të Ministrisë së Arsimit ishin zotuar se të mërkurën do t’i bënin publikë personat që kishin tentuar ta prishnin procesit e mbajtjes së testit të maturës, por një gjë e tillë nuk ndodhi.

Mustafë Kadriu ka thënë se mospublikimi i emrave të manipuluesve të testit të maturës është shtyrë për të hënën. Kjo shtyrje sipas tij, ka ndodhur për shkak të disa përgatitjeve shtesë.

“Të hënën do të dalim me emrat dhe mbiemrat e të gjithë personave që kanë kopjuar apo kanë tentuar të kopjojnë si dhe për administratorët të cilët nuk e kanë mbajtur rendin si duhet”, ka thënë Kadriu për gazetën Tribuna. Ai ka shtuar se tanimë i kanë identifikuar të gjithë personat që kanë manipuluar me testin e maturës. “Nxënësit të cilët kanë kopjuar do t’iu anulohet testi, ndërsa administratorët që nuk e kanë kryer punën si duhet, do të ndëshkohen”, ka sqaruar Kadriu. /Tribuna/.