Nga 42.052 maturantët sa i janë nënshtruar Provimit Shtetëror të Maturës në të dyja afatet këtë vit, 31.151 prej tyre e kanë kaluar atë duke e fituar të drejtën për të provuar regjistrimin në universitet.

Ministria e Arsimit, Shkencës dhe Teknologjisë (MAShT) ka bërë të ditur sot se 72.4 % e maturantëve që i janë nënshtruar provimit në të dy afatet- qershor dhe gusht- e kanë kaluar atë.

Shifrat e MAShT tregojnë se 11 mijë maturantë nuk kanë arritur ta kalojnë provimin në nivel kombëtar.

MAShT ka njoftuar se për provimin e maturës, testet u përgatitën në katër gjuhë (shqipe, turke, boshnjake dhe angleze).

Në afatin e dytë të Provimit Shtetëror të Maturës 2014 testit i janë nënshtruar 21.228 maturantë, prej të cilëve rezultat pozitiv arritën 9.283 apo 43.61%.

Më të suksesshëm janë treguar maturantët e gjimnazeve, prej të cilëve sukses pozitiv kanë arritur 13.822 maturantë (93.6%), kurse në arsimin profesional sukses pozitiv kanë arritur 17.329 maturantë apo 64.2%.

“KQShM falënderon të gjithë ata që ndihmuan në mbarëvajtjen e procesit, duke përfshirë edhe universitetet tjera publike, drejtoritë komunale të arsimit, Policinë e Kosovës, zyrtarët e MAShT-it dhe mbi të gjitha gazetarët, të cilët me korrektësi prezantuan procesin e administrimit të testit të maturës”, thuhet në komunikatën e MAShT./kallxo/